Tago de Holokaŭsta Memoro 2020

La 27-an de januaro 1945, la ekstermejo de Auschwitz estis liberigita. La Tago de Holokaŭsta Memoro, observata ĉiujare de Unuiĝintaj Nacioj, markas tiun okazon. Ĝis la fino de la jaro 1945, la milito en Eŭropo estis finita, Unuiĝintaj Nacioj estis fondita, kaj erao de relativa paco komenciĝis. Pasis depost tiam 75 jaroj.

La Tago de Holokaŭsta Memoro estas tago de funebrado de la milionoj da homoj kies vivoj estis forŝiritaj, kaj tago de agnoskado de tiuj kuraĝaj individuoj kiuj savis la vivojn de tiuj kiuj aliokaze estus pereintaj. Pli ol ses milionoj da judoj kaj centoj da miloj da ciganoj estis murditaj ene de nur kelkaj jaroj.

Inter la transvivantoj de la Holokaŭsto estis Louis-Christophe Zaleski-Zamenhof. Lia avo estis la fondinto de la Internacia Lingvo Esperanto, d-ro L.L. Zamenhof (1859-1917). Li naskiĝis en juda familio en Bjalistoko, kiu poste fariĝis parto de Pollando. Esperanto estis kreita por antaŭenigi pacon kaj komprenon inter la nacioj. Sekve, ne estas surprize, ke en sia libro Mein Kampf, Adolf Hitler denuncis Esperanton; nek surprize, ke la anoj de la familio Zamenhof estis speciale identigita por aresto kiam la Nazioj alvenis Varsovion. Adam, la filo de d-ro Zamenhof, estis mortpafita; la filinoj Zofia kaj Lidia estis murditaj en Treblinka, same la fratino Ida.

El la rektaj posteuloj de Zamenhof, nur la filo de Adamo, Ludoviko, poste Louis-Christophe Zaleski-Zamenhof, transvivis. Li eskapis el la Varsovia Getto kaj alprenis la fikcian kristanan nomon Krzysztof Zaleski – nomon kiun li ne plene forlasis eĉ post la milito kaj lia elmigro en Francion. “Se Zaleski savis Zamenhofon,” li diris, “ne decis, ke Zamenhof forturniĝu de li. Tial mi kunmetis ambaŭ nomojn kiel Ludwik Krzysztof Zaleski-Zamenhof, ĉar mi sentas min unu kaj la alia. La diferencoj en la unueco estas fundamento de la ideo de toleremo, kiun mi akceptis kiel la devizon de mia vivo.” Kaj Ludoviko aparte honoris Pastron Marceli Godlewski, de la Paroĥo de Ĉiuj Sanktuloj en Placo Grzybowski, kiu estis inter tiuj kiuj, je granda persona risko, ŝirmis la varsoviajn judojn, inter ili Ludovikon.

La 9-an de oktobro, 2019, Louis-Christophe Zaleski-Zamenhof mortis, post longa vivo en kiu li laboris por la spirito de toleremo kaj en kiu li restis fidela al la ideo de paco kaj kompreno kiu troviĝas ene de la lingvo kreita de lia avo kaj kiu estas partoprenata de la centoj da miloj, eĉ milionoj, kiuj, same kiel Zaleski-Zamenhof, parolas Esperanton, la lingvon de paco.

Universala Esperanto-Asocio funebras la lastatempan forpason de la nepo de la fondinto de Esperanto kaj memoras la milojn da parolantoj de Esperanto, laborantoj por la paco, kiuj mortis per la manoj de la Nazioj.

En tiu ĉi Tago, ni memoru la pasintecon kun instruo por la estonteco, ke neniam plu homoj estu persekutataj pro sia religia, genta aŭ kultura aparteno, kaj la homaro atente respektu la homajn rajtojn je libereco, interalie de kredo kaj lingvo.

Ni neniam forgesu.

Humphrey Tonkin

Reprezentanto de Universala Esperanto-Asocio al Unuiĝintaj Nacioj

 

Respondi

Entajpu viajn informojn sube aŭ alklaku piktogramon por ensaluti:

WordPress.com Logo

Vi komentas per via konto de WordPress.com. Elsaluti /  Ŝanĝi )

Google photo

Vi komentas per via konto de Google. Elsaluti /  Ŝanĝi )

Twitter picture

Vi komentas per via konto de Twitter. Elsaluti /  Ŝanĝi )

Facebook photo

Vi komentas per via konto de Facebook. Elsaluti /  Ŝanĝi )

Connecting to %s